FETA KAAS BROODROLLETJIES

Tuisgemaakte feta-kaas broodrolletjies
1 x 10 g pakkie kitsgis
400 g witbroodmeel en nog meel vir knie
5 ml sout
100 ml louwarm water
2 eiers
30 ml olyfolie
15 ml heuning
1 wiel feta-kaas
handvol sesamsaad
bietjie growwe sout
1. Plaas kitsgis in ’n mengbak saam met witbroodmeel en sout.
2. Meng louwarm water, 1 eier, olyfolie en heuning saam en giet by meel.
3. Meng in en knie vir sowat 15 minute of totdat die deeg glad en elasties is. Krummel die fetakaas en knie in deeg in.
4. Plaas in ’n groot bak gesmeer met olyfolie en bedek met kleefplastiek. Hou in ’n warm plek en laat rys vir sowat 1 uur of totdat die deeg verdubbel het in grootte.
5. Knie deeg af en vorm in klein ronde balletjies en plaas op gesmeerde bakplaat. Voorverhit oond tot 180 ºC.
6. Klits die oorblywende eier en verf die broodrolletjies daarmee. Besprinkel met sesamsaadjies en growwe sout. Laat weer rys tot verdubbel in grootte.
7. Bak broodjies vir sowat 20 minute of tot goudbruin. Haal uit oond en laat afkoel op draadrak.
8. Bedien warm of koud saam met die oestersop.*voelgoed*Henriette Wessels